Tamawayt
Yura t: Mimun Amsbrid (Biljika)

(Izri yad i ghad tghared d cwayt zi min kid ucigh ass nni n unebdui di ttvfegh abrid zi Nnadvur ghar Biya, ict n tuffut)

La vision est palpation par le regard (Merleau-Ponty)

Ghar tyuri n tfuct
Tekkar d zeg idves;
Arrimet n-nem tanefcaht di tayyut teddurruy;
Tbuzzvured s uzupnen
Deg wnebdu yad yarqqen.

X tghessva n-nem ssekkigh
Tittvawin inu -
Taryent akidem, tdvarent:
Tneqqed ayi s imzran.

Azvri n-nem ameghnan,
Yejja yi d azveynun,
Awaren inu tghufan,
Di tmijja, war d teffghen,
Idmaren inu ccûren,
S yizran war yiwidven.
Taryen ay d imettvawen: azvri n-nem war szmiregh!

Tneqqed ayi s tudart,
War zemmregh ad arnugh.
Ysigh s wsqinfet, ysra yi umedduker;
Yenna yi may cek yughin?
Nnigh as: mara yeffegh,
Buhber ndver ayi da –
Ad ghmummyegh dayem,
Ad dewregh nec zzayem;
Amen zzayem d kkigh, ad dewregh gharem.

Jar tiziwin n-nem,
Jar iyeddimen;
X tqiccawin n-nem, di tisi n ighezran,
X ighezdisan n-nem, x imura d isummar,
X tama n wagarw, itawi yi wannay.
Tittvawin war tyiwinent,
Ur inu yarennu di fad.

Rexxu i ssnegh mayemmi,
Cem sswen s idammen nsen;
Rexxu i ssnegh mayemmi,
Xafem mmuten:
Usmen x wazvri n-nem
Yeswizzedv ghars Wennidven.
(Mimun Amsbrid, m_amsbrid@hotmail.com)